Solmaz Şirin
Həyat yaşamağı bacaranındır, onun ilməsindən baş açanındır!
Şəhid balasıyam, ürəyim yara,
Atamın yoxluğu çox çəkir dara,
Möhtacam atamlı şən yuxulara.
Gecələr mənimlə, qoy, olsun atam,
Allahım, kömək et Türkiyəmizə,
Yanğından xilas et, mərhəmət eylə.
Bəla ver, cəza ver düşmənimizə.
Xəyanətə qarşı xəyanət eylə.
Ya Allahım, Yaradanım,
Yeri, göyü fəhm edənim,
Bəndələrə rəhm edənim,
Qurtar bizi bu bəladan.
İnsanlara ibrətçin, dərs üçün, tənə üçün,
Korona adlı bəla göndərmişdir İlahi.
Bəşər övladlarını ədəb, tərbiyə üçün,
Dünyanı məzlumluğa döndərmişdir İlahi.
Qurban olum, İlahi,
Sənin gözəl adına.
Yetirsən hər bəndənin
Köməyinə, dadına.
Alt-üst etmək istədi taleyimi kor fələk,
Evimi dağıtmağa qurdu mənə min kələk.
Çox şükür ki, o böyük Allah əmriylə yenə,
Ömrümün son yarısı qapı açıldı mənə.
Tanrı açmayıbdır insana sirri,
Özü yaradıbdır, xisləti bəlli.
İnsanın əlində olsaydı dünya,
Nə hala düşərdi, qisməti bəlli!
Bu dünyada nə qədər
Yalanlar var, İlahi!
Bu dünyanı yalanla
Alanlar var, İlahi!
Kim verməyir, heç verməsin,
Allah versin qiymətimi.
Kim görməyir, heç görməsin,
Allah görsün niyyətimi.
Allahım, Sənə şükür!
Mənə sağ can vermisən.
Şikəstlik qismətini
Uzaq nişan vermisən.