İstəyirəm mən əriyəm
Sənin sıcaq nəfəsində,
Sökülməz bir yuva tikəm
Qaynar sinə qəfəsində.

Məni sevməyəni mən heç sevmərəm,
Yer alt- üst olsa da, göy dağılsa da,
Məni saymayanı mən heç saymaram,
Həyatda bircə mən, bir o qalsa da.

O necə sazdır ki, görən, sinəmdə,
Onun ahəngini alan tapılmır?!
Necə möcüzə var məhəbbətimdə!
Onun avazına dalan tapılmır,

Harda qaldın, ey məhəbbət,
Ömür artıq olur yarı.
Buna dözmür daha həsrət,
İnsaf eylə, tez gəl, barı.

Əlçatmaz sevginin sorağındayam-
Elə sevginin ki, nakam olmasın,
Hələ qönçə ikən boynunu büküb,
Şaxtada, tufanda erkən solmasın.