Dedim, unudaram, görməsəm səni,
Unutmaq çətinmiş, hardan biləydim?
Məhəbbət sınağa çəkməmiş məni,
Sevgim çox mətinmiş, hardan biləydim?

Mən səni qəlbimdən silib atmışam,
Məni izləməyin nə mənası var?
Səninlə yollarım ayrılıb tamam,
Yolda gözləməyin nə mənası var?!

Mənimçin sən varsan, səninçin də mən,
Qeyri bir anlayış bilmədim qətən.
Bir canda iki ruh təkiyik zatən,
Bundan özgə aləm var olmaz mənə.