Özümü özümdə itirmişəm mən,
Özümü özümdə axtarır gözüm.
Artıq saçlarıma səpilibdir dən,
Özüm də bilmirəm hardayam özüm.

Könlüm göylər istəmişdi…
Budur, göydə uçuram mən.
Allah qanad verməmişdi,
Gümüş qanad üstündəyəm.

Mənim dünyam bambaşqadır,
Bu dünyayla heç tuş gəlmir.
Ürəyimlə başbaşadır,
Bu dünyanı sirdaş bilmir.

Dilin itiliyi bıçaqdan iti,
Onun yarasına məlhəm tapılmaz.
Sağalar ən dərin bıçaq yarası,
Dil vuran yaralar əsla sağalmaz.

Oyan, bəxtim, bəsdir yatdın,
Bəsdir dərdə, qəmə batdın.
Oyan, ömür axıb-gedir,
Oyan, ömür baxıb gedir!

Əsil gözəlliyə uymaq gözəldir,
Gözəlin ədası, nazı gözəldir.
Gözəldə gözəllik duymaq gözəldir,
Onu gözəl edən nazlı gözlərdir.

Pərən düşmüş kəpənək tək
Uçur göydə dənəciklər.
Rəqqasə tək rəqs edərək
Naz-nemətlə enəcəklər.

Gözəl diyarımın gözəl paytaxtı,
Bəxtəvər gözəl tək yazılmış baxtın,
Qara qızıldandır təməlin, taxtın,
Gözəllər gözəli, canımsan, Bakı,
Şərəfim, şöhrətim, şanımsan, Bakı!

Zaman quş qanadlı, uçur ömürdən,
Aylar bir-birini elə hey qovur.
İl də başa çatır, qaçır ömürdən,
Nədir bu qaçhaqaç, bu nə vurhavur?

Qəlbinin qapısın sən aç taybatay
İnsanlar üzünə, qəlblər gözünə.
Özündən böyüyü, həm kiçiyi say,
Baxma naxələfin nadan sözünə.