Mənim quzu Mələk qızım,
Qızım qızı Mələk qızım,
Gəl nənənin ocağına,
Anan yatmış qucağına.

Mehriban balalar, əziz uşaqlar,
Bir İyun gününüz mübarək olsun!
Sülhlə, məhəbbətlə yansın ocaqlar,
Qəlbiniz sevinclə, fərəhlə dolsun!

Vətəni çox sevirəm
Anam kimi əzizdir.
Anama və Vətənə
Məhəbbətim dənizdir.

Evimizin işığı
Gözəl anam, şən anam!
Səndən əziz kimim var?
Həmdəmimsən sən, anam!

Bu gün ad günündür, nübar ad günün,
İlk yaşın mübarək, gözəl Mələyim!
Bu gün günlərindən fərqli, şad günün,
Bir yaşın mübarək, dəcəl Mələyim!

Hər səhər tezdən durub
Məktəbə gedir bacım.
Aldığı qiymətlərlə
Bizi şad edir bacım.

Özüm kimi körpədir
Mənim Məstan pişiyim.
Yedirdirəm doyunca
Həm çəkirəm keşiyin.