Almasın əlimdən Allah qolumu,
Bu əli o ələ möhtac etməsin.
Qardaşı, bacını, əziz qohumu
Evində sağ etsin, tərac etməsin.

Görəsən, nə üçün bəxş etmiş Tanrı,
Bizi bu dünyaya, verərək can, qan?
O biri dünyanı yaratmaqçınmı,
Şirin canımızı edirik qurban?

Allah, yaratmısan yaşayım, gülüm,
Yaratmamısan ki, dərd-sərdən ölüm.
Dərdə yem üçünmü verdin canımı?
Qaraltmaq üçünmü verdin qanımı?

Gələn gəlir, gedən gedir…
Gələn gedər, gedən gəlməz.
Yaradan bu hökmü edir,
Gedən olur gedər-gəlməz.

Sənə yalvarıram, ey ulu Tanrı,
Qardaş qırğınına yol vermə bir an.
Sülhün işığına yönəlt onları,
İnsanla insan tək davransın insan.